టాలీవుడ్‌లో మాటల మాంత్రికుడిగా సక్సెస్ ఫుల్ డైరెక్టర్‌గా తనకంటూ ఓ ఇమేజ్ క్రియేట్ చేసుకున్నాడు త్రివిక్రమ్ శ్రీనివాస్. సినిమాల్లో త్రివిక్రమ్ డైలాగ్‌లకు ఫిదా కానీ వారుండరూ. అంతేగాదు మేకింగ్‌లోనూ కొత్తదనాన్ని చూపించే ఈ దర్శకుడు అప్పుడప్పుడు కాపీ క్యాట్ అనే విమర్శలు సైతం ఎదుర్కొన్నాడు. తాజాగా త్రివిక్రమ్‌పై ఇలాంటి సెటైర్లే వినిపిస్తున్నాయి.
ప్రస్తుతం పవన్‌-త్రివిక్రమ్ కాంబినేషన్‌లో సినిమా తెరకెక్కుతున్న సంగతి తెలిసిందే. ఈ సినిమాకు అజ్ఞాతవాసి అనే టైటిల్‌ని ఖరారు చేసినట్లు తెలుస్తోంది. అయితే ఈమూవీ వెంకీ సినిమాను కాపీ కొట్టినట్లు టాలీవుడ్‌లో వార్త చక్కర్లు కొడుతోంది.
వెంకీ హీరోగా వచ్చిన ఆనాటి రివేంజ్ డ్రామా ఒంటరి పోరాటం సినిమా అందరికీ గుర్తుండే వుంటుంది.విలన్‌పై ప్రతీకారం తీర్చుకోవాలనుకున్న జయసుధ అందుకు వెంకటేష్‌ని మార్గంగా ఎంచుకుంటుంది. తమ ఇద్దరికీ శత్రువు ఒక్కడే కావడంతో ఆ సినిమాలో హీరోగా నటించిన వెంకీ సైతం జయసుధ చెప్పిన పథకం ప్రకారమే తన ప్రతీకారం తీర్చుకుంటాడు.సరిగ్గా ఇదే స్టోరీని ఇనిస్పిరేషన్‌గా తీసుకుని త్రివిక్రమ్ అజ్ఞాతవాసి సినిమాను తెరకెక్కిస్తున్నాడనే ప్రచారం జరుగుతోంది.
గతంలో మీనా అనే పాత నవలని ‘అ ఆ’ సినిమాగా మలిచిన త్రివిక్రమ్ ఆ విషయాన్ని గోప్యంగా వుంచి విమర్శల పాలయ్యాడు. వెంకటేష్‌ నటించిన ‘వారసుడొచ్చాడు’ కథని మార్చి ‘అతడు’గా తీశాడు. ఇప్పుడు అదే వెంకీ సినిమాను అజ్ఞాతవాసిగా తెరకెక్కిస్తున్నాడట. మరి ఈ వార్తలు ఎంతవరకు నిజమో తెలియదు కానీ ప్రస్తుతం టీ టౌన్‌లో మాత్రం ఇదే హాట్ టాపిక్‌గా మారింది.
