ప్రస్తుతం బాలీవుడ్‌లో బయోపిక్‌ల హవా నడుస్తోంది. ఇప్పటికే వివిధ క్రీడాకారుల జీవితాలు సినిమాల రూపంలో తెరకెక్కగా తాజాగా మరో తార బయోపిక్‌ వెండితెరపై ఆవిష్కృతం కానుంది. పరుగుల రాణి పీటీ ఉష జీవితచరిత్ర ఆధారంగా తెరకెక్కుతోంది. ఈ సినిమాలో పిటి ఉషగా ప్రియాంక చోప్రా నటించనుంది. ఈ సినిమాను దక్షిణాది దర్శకురాలు రేవతి ఎస్ వర్మ భారీ బడ్జెత్ తో ఈ సినిమాను తెరకెక్కిస్తున్నారు. సంగీత దర్శకుడిగా ఏఆర్ రెహమాన్ ను సంప్రదిస్తున్నారట. గతంలో ప్రముఖ రెజ్లర్ మేరీ కోమ్ రియల్ స్టోరీ ఆధారంగా తెరకెక్కిన సినిమాలోనూ పింకీ చాప్స్ టైటిల్ రోల్ ప్లే చేసిన సంగతి తెలిసిందే.
ఇక త్వరలో భారత మహిళా జట్టు కెప్టెన్ మిథాలీ రాజ్‌ బయోపిక్‌ కూడా తెరకెక్కనుంది. ఈ సినిమాలో నటించేందుకు సమంత ఒప్పుకున్నట్లు టీ టౌన్‌లో ప్రచారం జరుగుతోంది. అదేవిధంగా హైదరాబాద్‌కు చెందిన స్టార్ టెన్నిస్ క్రీడాకారిణి సానియా మీర్జాతో పాటు స్టార్ బ్యాడ్మింటర్‌ పివి సింధు బయోపిక్‌ కూడా తెరకెక్కనున్నట్లు సమాచారం. ఎంతో మంది సినిమాల్లో నటించాలనిఅడిగినా ‘నో’ చెప్పిన సానియా… తన జీవిత చరిత్రను సినిమాగా తీయడానికి మాత్రం ఇటీవలే ఓకే చెప్పిందట.
భారత బ్యాడ్మింటన్‌కు సైనా నెహ్వాల్,సింధు వంటి ఆటగాళ్లను అందించిన పుల్లెల గోపిచంద్‌ బయోపిక్‌ కూడా త్వరలో ప్రేక్షకుల ముందుకు రానుంది. సూపర్ స్టార్ కృష్ణ మేనల్లుడు, హీరో సుధీర్‌బాబు (ప్రేమ కథా చిత్రం ఫేం) ఈ సినిమాలో గోపీచంద్ పాత్రలో నటి స్తున్నారు. వ్యక్తిగతంగా గోపీచంద్‌కి స్నేహితుడైన సుధీర్‌బాబు… ఈ సినిమా పట్ల అత్యంత ఆసక్తిగా ఉన్నాడని సమాచారం. ఇంకా పేరు పెట్టని ఈ చిత్రం త్వరలోనే పట్టాలకెక్కనుంది.
ఇప్పటికే భారత లెజెండ్ క్రికెటర్లు హైదరాబాద్ క్రికెట్ క్రీడాకారుడు అజహరుద్దీన్, ధోని, సచిన్‌ జీవిత చరిత్రల ఆధారంగా సినిమా తెరకెక్కి ప్రేక్షకుల ఆదరణ పొందాయి. వీరితో రన్నింగ్‌లో నేషనల్ ఛాంపియన్ మిల్కాసింగ్ కథతో వచ్చిన ‘భాగ్ మిల్కా భాగ్’తో పాటు బాక్సింగ్ క్రీడాకారిణి మేరీకోమ్ జీవిత చరిత్ర ఆధారంగా వచ్చిన హిందీ చిత్రం కూడా విజయవంతమయ్యాయి.
