జనతా గ్యారేజ్ లాంటి బ్లాక్ బస్టర్ సక్సెస్ తరువాత ఎన్టీఆర్ హీరోగా తెరకెక్కుతున్న సినిమా జై లవ కుశ. యువ దర్శకుడు బాబీ దర్శకత్వంలో తెరకెక్కుతున్న ఈ సినిమాలో ఎన్టీఆర్ త్రిపాత్రాభినయం చేస్తున్నాడు. జూనియర్ ఎన్టీఆర్ సోదరుడు, కళ్యాణ్ రామ్ ఎన్టీఆర్ ఆర్ట్స్ బ్యానర్ పై తెరకెక్కిన ఈ సినిమా విడుదలకి ముస్తాబవుతోంది. ఈ సినిమాలో ఎన్టీఆర్ మూడు విలక్షణమైన పాత్రలను పోషించాడు. ఆల్రెడీ ‘జై’ .. ‘లవ’ ‘కుశ’ పాత్రలకి సంబంధించిన ఫస్టులుక్ లు .. టీజర్లు రిలీజ్ చేశారు. ఇవి అభిమానులను ఎంతగానో ఆకట్టుకున్నాయి.
తాజాగా ‘కుశ’ పాత్రకి సంబంధించిన టీజర్ ను వదిలింది. కామెడీ .. యాక్షన్ సీన్స్ పై ఈ టీజర్ కట్ చేశారు. ఈ పాత్రలో ఎన్టీఆర్ మాస్ లుక్ తో కనిపిస్తున్నాడు. జై .. లవ .. పాత్రలకి పూర్తి భిన్నంగా ఈ పాత్ర కనిపిస్తూ ఉండటం విశేషం. ‘కొట్టేయడంతో పాటు కొట్టడం కూడా వచ్చురా” అంటూ ఎన్టీఆర్ చెప్పిన డైలాగ్ ఆకట్టుకునేదిలా వుంది.
మాస్ జనాలు కోరుకునే డ్యాన్స్‌, ఫైట్స్‌ ఉన్న ఈ టీజర్లో కుశ పాత్రను చూస్తే ఎన్టీఆర్ గత సినిమాల్లో కనిపించిన పాత్రలాగా అనిపిస్తోంది. టీజర్‌ను, దోచేస్తా అనే సాంగ్‌ను గమనిస్తే కుశ దొంగ అని తెలుస్తోంది. యమదొంగ, రామయ్య వస్తావయ్య సినిమాలో కూడా ఎన్టీఆర్ డబ్బు కోసం ఎదైనా చేసేవాడిగా కనిపించాడు. ఈ టీజర్లో కూడా అవే షేడ్స్ కనిపిస్తున్నాయి. మొదటి రెండు టీజర్ల మాదిరిగానే ఈ టీజర్ కూడా అభిమానుల్లో ఆనందాన్ని .. అందరిలో అంచనాలను పెంచేదిలా ఉందని చెప్పొచ్చు.
