ప‌వర్ స్టార్ పవన్ కల్యాణ్ 25వ చిత్రంగా మాటల మాంత్రికుడు త్రివిక్రమ్ డైరెక్షన్‌లో తెరకెక్కుతున్న సినిమాకు టైటిల్ ఖరారైందా అనే టాక్ వినిపిస్తోంది. గతంలో ఈ సినిమాకు ఇంజ‌నీర్ బాబు అనే టైటిల్ ప‌రిశీలనలో వుందనే వార్తలొచ్చిన సంగతి తెలిసిందే. ఆ త‌ర్వాత ‘రాజు వ‌చ్చినాడో’ అనే మరో టైటిల్ ఫిక్స్ చేసిన‌ట్టుగానూ కొంత ప్రచారం జ‌రిగింది. కానీ ఇవేవీ ఫైనల్ అవలేదు.
ఇదిలావుంటే, తాజాగా పవన్ కల్యాణ్ బర్త్ డే సందర్భంగా విడుద‌లైన పోస్టర్ల ప్రకారం ఈ సినిమాకు ‘అజ్ఞాత‌వాసి’ అనే టైటిల్ ఫిక్స్ చేయనున్నారనే ప్రచారం తెరపైకొచ్చింది. ఇంతకుముందు ప్రచారం జరిగిన పాత టైటిల్స్‌లాగే ఇది కూడా ఓ రూమరేనా లేక ఇందులో ఏమైనా నిజం వుందా అనేది తెలియాలంటే ఇంకొంత కాలం ఆగకతప్పదు.
హారిక అండ్ హాసిని క్రియేషన్స్ బ్యానర్‌పై రాధాకృష్ణ నిర్మిస్తున్న ఈ సినిమాలో కీర్తి సురేష్, అను ఇమ్మాన్యుయేల్ ఫీమేల్ లీడ్ రోల్స్ పోషిస్తున్నారు. ప్రముఖ కోలీవుడ్ కంపోజర్ అనిరుద్ రవి చంద్రన్ మ్యూజిక్ అందిస్తున్నారు. వచ్చే ఏడాది సంక్రాంతి పండగ కానుకగా జనవరి 10వ తేదీన ఈ సినిమా రిలీజ్ కానుంది.
