అజిత్ హీరోగా చేసిన ‘వివేగం’ భారీ స్థాయిలో తమిళనాట విడుదలైంది. ఈ సినిమాకి అక్కడ హిట్ టాక్ వచ్చేసినట్టు తెలుస్తోంది. అజిత్ అభిమానులకు ఈ సినిమా ఒక రేంజ్ లో నచ్చేసిందట. అయితే ఓపెనింగ్ క‌లెక్ష‌న్ల విష‌యంలో త‌మిళ న‌టుడు అజిత్, ర‌జ‌నీకాంత్ రికార్డును దాటేశాడని సమాచారం.`వివేగం` సినిమా చెన్నైసిటీలో మొద‌టి రోజు రూ. 1.21 కోట్లు రాబట్టినట్లు తెలుస్తోంది. `కబాలి` చిత్రం సృష్టించిన రూ. 1.12 కోట్ల మొద‌టి రోజు క‌లెక్ష‌న్ల మార్కును ఈ చిత్రం దాటేసింది.
ఇందులో కాజల్‌, వివేక్‌ ఓబెరాయ్‌, అక్షర హాసన్‌లు కీల‌క పాత్ర‌లు పోషించారు. దీనికి శివ దర్శకత్వం వహించగా అనిరుధ్ స్వ‌రాలు అందించారు. మొద‌టి రోజే మంచి టాక్‌తో చెన్నై సిటీ బాక్సాఫీసు వద్ద వసూళ్ల వ‌ర్షం కురిపించింది. ఇదిలా ఉండ‌గా గ‌తంలో విజయ్ న‌టించిన ‘తెరి’ చిత్రం రూ. 1.05 కోట్లు రాబ‌ట్టింది. అలాగే అమెరికాలో కూడా ‘వివేగం’ సినిమా భారీ వ‌సూళ్లు రాబ‌డుతోంది. అక్కడ మొద‌టి రోజు రూ. 1.37 కోట్లు రాబట్టినట్లు సమాచారం.
అంతేకాదు తమిళంలో దర్శకుడు శివకి .. అజిత్ కి ఇది మూడవ సినిమా కనుక వాళ్లిద్దరి ఖాతాలో హ్యాట్రిక్ హిట్ నమోదైపోయింది. అజిత్ న్యూ లుక్ .. భారీ యాక్షన్ సీన్స్ .. ఆశ్చర్యచకితులను చేసే విజువల్ ఎఫెక్ట్స్ ఈ సినిమా సక్సెస్ లో ప్రధానమైన పాత్రను పోషించాయని చెప్పుకుంటున్నారు.
