ఫిదా సినిమాతో ఒక్కసారిగా స్టార్ ఇమేజ్ సొంతం చేసుకున్న నేచురల్ బ్యూటీ సాయి పల్లవి. ఈ మల్లార్ బ్యూటీ క్రేజ్ ను క్యాష్ చేసుకునేందుకు రెడీ అవుతున్నారు టాలీవుడ్ నిర్మాతలు. అందుకే సాయి పల్లవి లీడ్ రోల్ లో గతంలో రిలీజ్ అయిన మలయాళ సినిమాల మీద దృష్టి పెట్టారు.
ఒకే బంగారం సినిమాతో టాలీవుడ్ ప్రేక్షకులకు చేరువైన దుల్కర్ సల్మాన్ హీరోగా సాయి పల్లవి హీరోయిన్ గా తెరకెక్కిన మలయాళ సినిమాను తెలుగులో ల‌క్ష్మీ చెన్న‌కేశ‌వ ఫిలింస్ ప‌తాకంపై `హేయ్‌.. పిల్ల‌గాడ` అనే పేరుతో ప్ర‌ముఖ సీడెడ్ డిస్ట్రిబ్యూట‌ర్ డి.వి.కృష్ణ‌స్వామి విడుద‌ల చేస్తున్నారు. స‌మీర్ తాహిర్ ద‌ర్శ‌కుడు. ఈ సినిమా లోగోను ద‌ర్శ‌కుడు శేఖ‌ర్ క‌మ్ముల విడుద‌ల చేశారు.
ఈ సంద‌ర్భంగా ఆయన మాట్లాడుతూ దుల్కర్ సల్మాన్, సాయిప‌ల్ల‌వి జంట‌గా న‌టించిన చిత్రం క‌లి. ఈ చిత్రం మ‌ల‌యాళం, త‌మిళంలో పెద్ద విజ‌యాన్ని సాధించింది. ఈ సినిమాను తెలుగులో హే పిల్ల‌గాడా! అనే పేరుతో విడుద‌ల చేస్తున్నారు. తెలుగులో సినిమా పెద్ద హిట్ కావాల‌ని కోరుకుంటూ దుల్కర్, సాయిప‌ల్ల‌వి స‌హా నిర్మాత‌కు అభినంద‌న‌లు అని అన్నారు. అయితే హిట్ కాంబినేషన్ లో పాపులర్ టైటిల్ తో వస్తున్న ఈ సినిమా ఎంత వరకు ఆకట్టుకుంటుందో చూడాలి.
