హైదరాబాదు, జూబ్లీహిల్స్ రోడ్‌ నెం.2లోని షాంగ్రిల్లా ప్లాజాలో ఉన్న హైడ్రోజన్‌ పబ్‌ పై వెస్ట్‌ జోన్‌ టాస్క్ ఫోర్స్ పోలీసులు దాడులు చేశారు. ఈ దాడుల్లో ముజ్రా పార్టీ చేసుకుంటున్న హైదరాబాదీ యువకులతో పాటు, ముంబై యువతులను పోలీసులు అదుపులోకి తీసుకున్నారు. పెద్ద ఎత్తున విదేశీ మద్యం, గంజాయి, ఖరీదైన సిగరెట్లు, డ్రగ్స్‌ ను స్వాధీనం చేసుకున్నారు.
ముజ్రా పార్టీ నిర్వహించేందుకు 68 మంది యువతీ యువకులు 3 లక్షల రూపాయల అద్దె చెల్లించారు. రాత్రంతా జరిగే ఈ పార్టీలో మందు, విందు, చిందు నిర్వహించేందుకు పకడ్బందీ ప్లాన్ వేశారు. పార్టీలో పాల్గొనేందుకు ఒక్కొక్కరు చేరుకుంటుండగా, టాస్క్ ఫోర్స్ పోలీసులు పక్కా సమాచారంతో ఎంట్రీ ఇచ్చి పార్టీని భగ్నం చేశారు.
ఆరుగురు యువతులతోపాటు ఒక హిజ్రాను, పదకొండు మంది యువకులను, పబ్‌ మేనేజర్‌ పద్మనాభంను అరెస్టు చేశారు. ఇందులో మహ్మద్‌ ముసాక్‌, అబ్ధుల్‌ రహమాన్‌, వసీం, ఫిర్దోజ్‌ఖాన్‌, మహ్మద్‌ మహీన్‌, అహ్మద్‌, సలీం, అహ్మద్‌ బిన్‌ అమర్‌, అబ్ధుల్‌ ఉస్మాన్‌, సోహైల్‌ తదితరులు ఉన్నారు.పబ్‌ యజమాని పరారీలో ఉన్నాడు. పోలీసులు కేసులు నమోదు చేసి దర్యాప్తు చేస్తున్నారు.
