శ్రీశైలం మహాక్షేత్రం కార్తీక సోమవారం సందర్భంగా ఆధ్యాత్మిక శోభను సంతరించుకుంది. పవిత్ర కార్తీక మాసం, అందులోనూ సోమవారం కావడంతో శ్రీ భ్రమరాంబ సమేత మల్లికార్జున స్వామివార్ల దర్శనం కోసం భక్తులు భారీగా తరలివచ్చారు. వారాంతపు సెలవులు, కార్తీక సోమవారం కలిసి రావడంతో ఆలయానికి భక్తుల రద్దీ గణనీయంగా పెరిగింది. దీంతో శ్రీశైలం క్షేత్రం హరహర మహాదేవ, శంభో శంకర నామస్మరణలతో మార్మోగుతోంది.
తెల్లవారుజాము నుంచే భక్తులు పాతాళగంగకు చేరుకుని పవిత్ర పుణ్యస్నానాలు ఆచరించారు. అనంతరం కార్తీక దీపాలు వెలిగించి ప్రత్యేక పూజలు నిర్వహించారు. గంగాస్నానం, దీపారాధనతో పాటు మల్లన్న దర్శనం చేసుకుంటూ భక్తులు ఆధ్యాత్మిక ఆనందంలో మునిగిపోయారు. కార్తీక మాసంలో శివుడిని దర్శించుకుని దీపారాధన చేయడం వల్ల సకల పాపాలు తొలగి పుణ్యఫలం లభిస్తుందని భక్తుల ప్రగాఢ విశ్వాసం.
మరోవైపు స్వామివారితో పాటు అమ్మవారి దర్శనం కోసం భక్తులు భారీగా క్యూ లైన్లలో వేచి ఉన్నారు. దర్శనానికి సుమారు ఐదు గంటల సమయం పడుతుండటంతో భక్తులు ఓపికగా తమ వంతు కోసం ఎదురుచూస్తున్నారు. భక్తుల రద్దీని దృష్టిలో ఉంచుకుని ఆలయ సిబ్బంది ప్రత్యేక ఏర్పాట్లు చేశారు. క్యూ లైన్లలో వేచి ఉన్న భక్తులకు అల్పాహారం, పాలు, బిస్కెట్లు పంపిణీ చేస్తున్నారు.
Also Read:గొప్ప అనుభూతిని ఇచ్చే ‘ఆకాశంలో ఒక తార’!
భక్తుల శివనామస్మరణ, కార్తీక దీపాల వెలుగులతో శ్రీశైలం మహాక్షేత్రం భక్తిభావంతో కళకళలాడుతోంది. కార్తీక సోమవారం సందర్భంగా మల్లన్నను దర్శించుకుని ప్రత్యేక పూజలు నిర్వహించేందుకు వివిధ ప్రాంతాల నుంచి భక్తులు పెద్ద సంఖ్యలో తరలిరావడంతో క్షేత్రంలో ఆధ్యాత్మిక వైభవం వెల్లివిరిసింది.

