‘ది ప్యారడైజ్’..కేసీఆర్ జాతర!

న్యాచురల్ స్టార్ నాని, శ్రీకాంత్ ఓదెల కాంబినేషన్‌లో వచ్చిన పాన్ ఇండియా యాక్షన్ డ్రామా ‘ది ప్యారడైజ్’ (The Paradise) ఇవాళ ప్రపంచవ్యాప్తంగా గ్రాండ్‌గా విడుదలై అద్భుతమైన రెస్పాన్స్ తెచ్చుకుంటోంది. బుధవారం నాటి ప్రీమియర్ల నుంచే ఈ సినిమాలోని ‘శంకరన్న’ (ఎమ్మెల్యే శంకరన్న) పాత్ర థియేటర్లలో ప్రత్యేక ఆకర్షణగా నిలిచి విశేషంగా ఆకట్టుకుంటోంది.

నటుడు ప్రియదర్శి పోషించిన ఈ శంకరన్న పాత్ర, తెలంగాణ తొలి ముఖ్యమంత్రి, బీఆర్ఎస్ అధినేత కేసీఆర్‌ను గుర్తుకు తెస్తుండటంతో సోషల్ మీడియాలో విపరీతంగా వైరల్ అవుతోంది. ప్రియదర్శి తెలంగాణ యాస, రాజకీయ నాయకుడి మేనరిజమ్స్ మరియు బాడీ లాంగ్వేజ్ అచ్చం కేసీఆర్‌ను పోలి ఉన్నాయని ప్రేక్షకులు కొనియాడుతున్నారు.

ముఖ్యంగా సవారీ తెగ ప్రజల అస్తిత్వం, గుర్తింపు కోసం పోరాడే క్రమంలో శంకరన్న చెప్పే పవర్‌ఫుల్ డైలాగ్స్‌కు థియేటర్లలో విజిల్స్ పడుతున్నాయి. “బక్కగా ఉన్నాడు వీడు ఏం చేస్తాడులే అనుకోకు.. సావు నోట్లో తలకాయ పెట్టేసినాసరే.. మీకు గుర్తింపు తీసుకొస్తా!” అంటూ ప్రియదర్శి పలికిన సంభాషణలు నెట్టింట ట్రెండ్ అవుతున్నాయి.

నాని పవర్‌ఫుల్ మాస్ యాక్షన్, అనిరుధ్ రవిచందర్ అదిరిపోయే బ్యాక్‌గ్రౌండ్ స్కోర్‌కు తోడుగా ప్రియదర్శి క్యామియో అప్పీరెన్స్ సినిమాకు ప్రధాన బలంగా మారింది. దీనికితోడు, సీనియర్ నటుడు పీ. విజయ్ కుమార్ దివంగత ఎన్టీఆర్‌ను పోలిన పాత్రలో కనిపించడం ఈ సినిమాకు అదనపు హైలైట్‌గా నిలిచింది. మొత్తానికి ‘ది ప్యారడైజ్’ బాక్సాఫీస్ వద్ద విజృంభిస్తోంది!

Also Read:BB10:లెటర్స్‌ కోసం టెంప్టేషన్ వార్!