114 రఫేల్ జెట్లపై భారత్ లేఖపై ఫ్రాన్స్!

భారత వైమానిక దళం (IAF) కోసం 114 రఫేల్ యుద్ధ విమానాల కొనుగోలుకు సంబంధించి రెండు ప్రభుత్వాల మధ్య ఒప్పందం కోసం భారత్ పంపిన అభ్యర్థన లేఖకు ఫ్రాన్స్ స్పందించే అవకాశం ఉంది. ఫ్రాన్స్ అధికారిక సమాధానాన్ని సమర్పించిన తర్వాత న్యూఢిల్లీ మరియు పారిస్ మధ్య అధికారిక చర్చలు ప్రారంభం కానున్నాయి.

ఈ ఏడాది మే నెలలో భారత్ ఈ లేఖను ఫ్రాన్స్‌కు అందజేయగా ఫ్రాన్స్ అధికారులు ఆగస్టు వరకు సమయం కోరారు. ఫ్రాన్స్ తన స్పందన ఇచ్చిన తర్వాతే ఫ్రాన్స్‌తో చర్చలు జరుగుతాయని అధికారులు వెల్లడించారు. భారత వైమానిక దళం కోసం 114 రఫేల్ ఫైటర్ జెట్లను కొనుగోలు చేసే ప్రక్రియలో భాగంగా ప్రభుత్వాల మధ్య ఒప్పందం కోసం చర్చలు ప్రారంభించేందుకు భారత్ ఈ ఏడాది మేలో ఫ్రాన్స్‌కు అభ్యర్థన లేఖను (LoR) పంపింది.

ఈ ప్రతిపాదన ప్రకారం 94 విమానాలను ఫ్రాన్స్‌కు చెందిన దసాల్ట్ ఏవియేషన్ ఒక భారతీయ భాగస్వామ్య సంస్థతో కలిసి భారతదేశంలోనే తయారు చేస్తుంది. ఇది దేశీయ ఏరోస్పేస్ తయారీ రంగానికి పెద్దపీట వేయనుంది. స్వదేశీ పరిజ్ఞానంతో రూపొందుతున్న LCA మార్క్ 1A మరియు రాబోయే LCA మార్క్ 2ల రాకలో ఆలస్యం అవుతుండటంతో వైమానిక దళంలో స్క్వాడ్రన్ల సంఖ్య నిలకడగా తగ్గుతూ వస్తోంది. ఈ నేపథ్యంలో ఈ రఫేల్ జెట్ల కొనుగోలు ఐఏఎఫ్ (IAF)కి అత్యంత కీలకమైనదిగా మారింది.

Also Read:‘నేను రెడీ’..పెద్ద విజయం సాధించాలి!

భారత వైమానిక దళం మరియు భారత నౌకాదళం ఇప్పటికే మొత్తం 62 రఫేల్ జెట్లకు ఆర్డర్ ఇచ్చాయి. ఒకవేళ ఈ 114 విమానాల ఒప్పందం ఖరారైతే, భారత్ వద్ద ఉన్న రఫేల్ విమానాల సంఖ్య 176కి పెరుగుతుంది. సముద్ర ఆధారిత కార్యకలాపాల కోసం భారత నౌకాదళం మరో 31 రఫేల్ విమానాలను కొనుగోలు చేసేందుకు ఆసక్తి చూపింది. ఇదే గనుక జరిగితే దేశంలో మొత్తం రఫేల్ విమానాల సంఖ్య 200 దాటే అవకాశం ఉంది.