వర్షం కురుస్తున్నప్పటికీ అమెరికా స్వాతంత్ర్య 250వ వార్షికోత్సవ వేడుకలు నిరంతరాయంగా సాగుతాయని అమెరికా అధ్యక్షుడు డొనాల్డ్ ట్రంప్ ప్రకటించారు. వర్ష సూచనను కొట్టిపారేసిన ట్రంప్, “ఏది ఏమైనప్పటికీ” తాను ఈ కార్యక్రమానికి హాజరవుతానని చెప్పారు. ఒకవేళ ఆలస్యమైనా సరే మద్దతుదారులు సంతోషంగా గడపాలని ఆయన కోరారు. త్వరలోనే తనిఖీ కేంద్రాలను మళ్లీ తెరుస్తామని యుఎస్ సీక్రెట్ సర్వీస్ తెలిపింది.
ట్రంప్ తన ‘ట్రూత్ సోషల్’ సోషల్ మీడియా ఖాతాలో పోస్ట్ చేస్తూ తుఫానులు ఏ సందర్భానికైనా అదృష్టాన్ని తెస్తాయి. అవి ఈవెంట్లను మరింత ఉత్సాహభరితంగా మారుస్తాయి. మేము వేచి ఉంటాము…అది అర్ధరాత్రి 2 గంటలైనా లేదా ఇప్పటి నుండి ఒక గంట అయినా నాకు పర్వాలేదు. వర్షం తగ్గిపోయేలా కనిపిస్తోంది, ఎప్పుడూ అలాగే జరుగుతుంది. ఏది ఏమైనా నేను అక్కడ ఉంటాను. ఇది శనివారం రాత్రి, ఈ రాత్రి మనం ఆలస్యంగానైనా సరే కాస్త సరదాగా గడుపుదాం అని పేర్కొన్నారు.
రాత్రి 11:00 గంటలకు షెడ్యూల్ చేయబడిన తన ప్రసంగ సమయంపై వస్తున్న ఆందోళనలను కూడా ట్రంప్ తోసిపుచ్చారు. గతంలో జరిగిన ఒక యూఎఫ్సీ (UFC) ఈవెంట్ను ప్రస్తావిస్తూ అప్పుడు కూడా 100% భారీ వర్షం కురిసే అవకాశం ఉందన్న అంచనాలు నిజం కాలేదని అధ్యక్షుడు గుర్తుచేశారు.
వాతావరణం ఎలా ఉన్నప్పటికీ వేడుకలు కొనసాగుతాయని X (ట్విట్టర్) లోని అధికారిక ‘ఫ్రీడమ్ 250’ ఖాతా కూడా ధృవీకరించింది. ట్రంప్ ఆదేశాల మేరకు నేషనల్ మాల్ గేట్లు రాత్రి 9:45 గంటలకు తిరిగి తెరుచుకుంటాయని… రాత్రి 11:00 గంటలకు అధ్యక్షుడు ప్రసంగిస్తారని ఆ తర్వాత అద్భుతమైన బాణసంచా వేడుకలు ఉంటాయని తెలిపింది. అంతకుముందు రోజు ప్రమాదకరమైన తుఫాను కారణంగా యుఎస్ సీక్రెట్ సర్వీస్ తనిఖీ కేంద్రాలను మూసివేసి, ప్రజలను సురక్షిత ప్రాంతాల్లో ఆశ్రయం పొందాలని కోరింది.
Also Read:భారీ వర్షాలు..ముంబైకి రెడ్ అలర్ట్