ముఖ్యమంత్రి రేవంత్ రెడ్డి ప్రసంగంపై తీవ్ర విమర్శలు చేశారు బీఆర్ఎస్ వర్కింగ్ ప్రెసిడెంట్ కేటీఆర్. ఆయన ప్రసంగంలో సరైన అంశాలు లేకపోవడమే కాకుండా, ప్రజలకు ఇచ్చిన ఆరు గ్యారెంటీల గురించి ఎక్కడా ప్రస్తావన లేదని కేటీఆర్ ఆరోపించారు. ఈ ప్రసంగం పూర్తిగా స్వీయప్రశంసలకే పరిమితమైందని, ప్రజా సమస్యలపై ఎలాంటి స్పష్టత లేదని అన్నారు.
కాంగ్రెస్ ప్రభుత్వం ఇచ్చిన హామీలను పూర్తిగా విస్మరించి, కొత్తగా “Cure, Pure, Rare” వంటి మాటలు తీసుకురావడం ప్రజలను తప్పుదోవ పట్టించే ప్రయత్నమని విమర్శించారు. రైతు బంధు, ఉద్యోగాల భర్తీ, పీఆర్సీ వంటి కీలక అంశాలపై ప్రభుత్వం నిశ్శబ్దంగా ఉందని, నిరుద్యోగులు మోసపోయారని చెప్పారు. అలాగే మూసీ ప్రక్షాళన ప్రాజెక్ట్ ఖర్చులపై కూడా అనుమానాలు వ్యక్తం చేస్తూ, అవసరానికి మించి భారీ నిధులు కేటాయించడం వెనుక ఉద్దేశ్యం ఏమిటో చెప్పాలని డిమాండ్ చేశారు.
గతంలో కేసీఆర్ చేపట్టిన మిషన్ కాకతీయ ద్వారా వేలాది చెరువులు అభివృద్ధి చేశామని గుర్తుచేసిన కేటీఆర్, ప్రస్తుత ప్రభుత్వం మాత్రం చిన్న పనులను పెద్దగా చూపిస్తూ ప్రచారం చేసుకుంటోందని విమర్శించారు. రాష్ట్ర అప్పుల విషయంలో కూడా ప్రభుత్వం తప్పుడు గణాంకాలు చెబుతోందని, నిజాలను వక్రీకరిస్తోందని ఆరోపించారు.
Also Read:హైకోర్టులో కాంగ్రెస్ ప్రభుత్వానికి ఎదురుదెబ్బ
అలాగే రాహుల్ గాంధీ పేరును ప్రస్తావిస్తూ, రాష్ట్ర నిధులు రాజకీయ ప్రయోజనాలకు మళ్లుతున్నాయనే అనుమానాలు వ్యక్తం చేశారు. ప్రజల ఇళ్లను కూల్చడమే తప్ప కొత్త ఇళ్లు నిర్మించలేదని, పేదల సమస్యలను పట్టించుకోవడం లేదని అన్నారు.ముఖ్యమంత్రి మాట్లాడే తీరు సరికాదని, సంస్కారం పాటించాలని సూచించిన కేటీఆర్, ప్రభుత్వం హామీలను అమలు చేయకపోతే బీఆర్ఎస్ తరపున తీవ్రంగా పోరాడతామని హెచ్చరించారు. తెలంగాణ ప్రజలు ఈ పరిస్థితిని గమనిస్తున్నారని, భవిష్యత్తులో తగిన నిర్ణయం తీసుకుంటారని తెలిపారు.