మహా శివరాత్రి సందర్భంగా జగిత్యాల జిల్లాకు చెందిన సూక్ష్మ కళాకారుడు, గౌరవ డాక్టరేట్ మరియు గిన్నీస్ బుక్ వరల్డ్ రికార్డు గ్రహీత గుర్రం దయాకర్ మరో అద్భుత సృష్టితో ఆకట్టుకున్నారు. ఈసారి ఆయన దబ్బనం అంచున నాగుపాము పడగ నీడలో కూర్చున్న శివయ్య రూపాన్ని అత్యంత సూక్ష్మంగా చెక్కి తన ప్రతిభను చాటుకున్నారు. సాధారణంగా కనిపించే దబ్బనాన్ని కళాఖండంగా మలచడం నిజంగా విశేషం.
చాలా చిన్న ఉపరితలంపై శివయ్య విగ్రహాన్ని సృష్టించడం ఎంతో కష్టసాధ్యమైన పని. అయినప్పటికీ దయాకర్ తన నైపుణ్యంతో శివుని జటాజూటం, త్రిశూలం, నాగుపాము పడగ వంటి ప్రతీ వివరాన్ని స్పష్టంగా ప్రతిబింబించారు. ముఖ్యంగా నాగుపాము పడగ నీడలో ధ్యానముద్రలో కూర్చున్న శివయ్య రూపం భక్తులను మంత్రముగ్ధులను చేస్తోంది. ఈ కళాఖండాన్ని రూపొందించడానికి దాదాపు 10 గంటల సమయం పట్టిందని ఆయన తెలిపారు.
మహా శివరాత్రి పర్వదినాన్ని పురస్కరించుకుని రూపొందించిన ఈ సూక్ష్మ శిల్పం భక్తి భావాన్ని ప్రతిబింబించడమే కాకుండా, భారతీయ సాంప్రదాయ కళల వైభవాన్ని ప్రపంచానికి చాటి చెబుతోంది. గుర్రం దయాకర్ చేసిన ఈ సృష్టి సోషల్ మీడియాలో కూడా ప్రశంసలు అందుకుంటోంది. చిన్నదైన దబ్బనంపై ఇంత గొప్ప కళా రూపాన్ని ఆవిష్కరించడం ఆయన ప్రతిభకు నిదర్శనం అని కళాభిమానులు అభిప్రాయపడుతున్నారు.
Also Read:శివరాత్రి…ఉపవాసం ఎందుకు!