బంగ్లాదేశ్లో కొనసాగుతున్న అశాంతి నేపథ్యంలో రాజ్బారి జిల్లాలో హిందూ యువకుడు అమృత్ మండల్ అలియాస్ సమ్రాట్ హత్యను చీఫ్ అడ్వైజర్ మహమ్మద్ యూనస్ నేతృత్వంలోని తాత్కాలిక ప్రభుత్వం తీవ్రంగా ఖండించింది. అయితే ఈ హత్యకు సామూహిక (మతపరమైన) కోణం లేదని ప్రభుత్వం స్పష్టం చేసింది. యువ నాయకుడిగా పేరొందిన అమృత్ మండల్ను బుధవారం రాత్రి పాంగ్షా ఉపజిలాలోని హుస్సేన్డాంగ ఓల్డ్ మార్కెట్ ప్రాంతంలో కొట్టి చంపినట్లు అధికారులు తెలిపారు.
గురువారం రాత్రి విడుదల చేసిన ప్రకటనలో, ఈ ఘటన మతపరమైన హింసకు సంబంధించినది కాదని బంగ్లాదేశ్ ప్రభుత్వం పేర్కొంది. అలాగే అమృత్ మండల్పై 2023లో నమోదైన హత్య, బెదిరింపులు (ఎక్స్టార్షన్) సహా పలు తీవ్రమైన క్రిమినల్ కేసులు ఉన్నాయని వెల్లడించింది. ఆ కేసుల నేపథ్యంలో అతనిపై అరెస్ట్ వారెంట్లు కూడా జారీ అయినట్లు తెలిపింది.
పోలీసుల సమాచారం, ప్రాథమిక దర్యాప్తు ప్రకారం ఈ ఘటనకు మతపరమైన హింసతో ఎలాంటి సంబంధం లేదు. ఇది బెదిరింపులు, నేర కార్యకలాపాల వల్ల ఉత్పన్నమైన హింసాత్మక పరిస్థితి. అమృత్ మండల్ అలియాస్ సమ్రాట్ అనే వ్యక్తి టాప్ క్రిమినల్గా గుర్తించబడి, ఎక్స్టార్షన్ డబ్బులు వసూలు చేయాలనే ఉద్దేశంతో ఆ ప్రాంతానికి వచ్చాడు. ఆ సమయంలో ఆగ్రహించిన స్థానికులతో జరిగిన ఘర్షణలో అతను ప్రాణాలు కోల్పోయాడు అని ప్రకటనలో పేర్కొంది.
ఇదిలా ఉండగా, అమృత్ మండల్ (29) హత్యతో బంగ్లాదేశ్లో మరోసారి ఉద్రిక్తతలు చోటుచేసుకున్నాయి. ఇటీవల 32 ఏళ్ల షరీఫ్ ఉస్మాన్ హాది హత్య అనంతరం దేశంలో అశాంతి చెలరేగింది. అంతకుముందు మైమెన్సింగ్లో గార్మెంట్ ఫ్యాక్టరీలో పనిచేసే దీపు చంద్ర దాస్ను మతదూషణ ఆరోపణలపై లించ్ చేసిన ఘటన కూడా కలకలం రేపింది. అయితే దాస్ను తప్పుడు కేసులో ఇరికించారని ఆరోపణలు ఉన్నాయి.
ఇంకా, ఇన్కిలాబ్ మోంచో సహ వ్యవస్థాపకుడు, ప్రతినిధి అయిన షరీఫ్ ఉస్మాన్ హాది హత్య తర్వాత దేశవ్యాప్తంగా హింస మళ్లీ చెలరేగింది. మాజీ ప్రధాని షేక్ హసీనా ప్రభుత్వాన్ని కూల్చిన నిరసనల్లో కీలక పాత్ర పోషించిన హాది, ఫిబ్రవరి 12న జరగనున్న పార్లమెంటరీ ఎన్నికల్లో పోటీ చేయాలని భావించాడు. ఈ నెల ప్రారంభంలో ఢాకాలో ప్రచారం చేస్తున్న సమయంలో తలపై కాల్చగా, సింగపూర్కు తరలించిన అనంతరం గాయాలకు తలొంచి మృతి చెందాడు. ఈ కేసులో ప్రధాన నిందితుడి సహచరుడిని పోలీసులు అరెస్ట్ చేయగా, మిగతా నిందితుల కోసం దర్యాప్తు కొనసాగుతోంది.
Also Read:శ్రీవారి సన్నిధిలో మోహన్ భగవత్