హైదరాబాద్ కార్వాన్ అసెంబ్లీ నియోజకవర్గానికి చెందిన ఎంఐఎం ఎమ్మెల్యే కౌసర్ మొహియుద్దీన్ భార్య నజ్మా సుల్తానా గ్రామీణ స్థానిక సంస్థల ఎన్నికల్లో సర్పంచ్ పదవికి పోటీ చేస్తున్నారు. మొహియుద్దీన్ స్వగ్రామమైన మెదక్ జిల్లా వెల్దుర్తి మండలం బస్వాపూర్ గ్రామం నుంచి ఆమె తన నామినేషన్ పత్రాలను నిన్న అధికారికంగా దాఖలు చేశారు.
నజ్మా సుల్తానా రాజకీయ రంగంలో కొత్తవ్యక్తి కాదు. గతంలో హైదరాబాద్లోని గోల్కొండ, నానక్నగర్ డివిజన్ల నుంచి రెండు సార్లు కార్పొరేటర్గా సేవలందించి ప్రజల్లో మంచి గుర్తింపు సంపాదించారు. పట్టణ పాలనలో అనుభవం ఉన్న ఆమె ఇప్పుడు గ్రామీణ అభివృద్ధి లక్ష్యంగా సర్పంచ్ పదవికి పోటీ చేయడం చర్చనీయాంశంగా మారింది.
బస్వాపూర్ గ్రామ అభివృద్ధి, మౌలిక సదుపాయాల విస్తరణ, మహిళల సంక్షేమ కార్యక్రమాలపై ప్రత్యేక దృష్టి పెట్టాలని నజ్మా ప్రచారంలో చెబుతున్నట్లు స్థానికులు తెలియజేశారు. గ్రామ ప్రజల సమస్యలను గుర్తించి పరిష్కరించడంలో తనకు వీలైనంత సేవ చేస్తానని ఆమె ప్రమాణ పూర్వకంగా చెప్పినట్లు సమాచారం.
ఎంఐఎం నేతల నుంచి ఆమెకు బలమైన మద్దతు లభించగా, గ్రామంలో కూడా ఆమె అభ్యర్థిత్వంపై చర్చ నెలకొంది. సర్పంచ్ అభ్యర్థిగా నజ్మా సుల్తానా రంగంలోకి దిగడంతో బస్వాపూర్ గ్రామ ఎన్నికలు మరింత హోరాహోరీగా మారే అవకాశాలు కనిపిస్తున్నాయి.
Also Read:TTD:వీఐపీ బ్రేక్ దర్శనాలు రద్దు