సూపర్ స్టార్ రజినికాంత్‌ రాజకీయాల్లోకి వస్తున్నారంటూ ఇంతకు ముందే జోరుగా వార్తలు చక్కర్లుకొట్టాయి. అయితే రజిని మాత్రం ఆ విషయాన్ని ఎప్పుడూ బహిరంగంగా చెప్పలేదు. ఇదే నేపథ్యంలో సూపర్‌స్టార్‌ రజనీకాంత్‌ రాజకీయ రంగప్రవేశ అంశం తెరపైకి వస్తూనే ఉంది.
రజిని రాజకీయాల్లోకి రావాలని అభిమానులు ఎప్పటి నుంచో కోరుతున్నది వాస్తవం. మరోవైపు వివిధ రాజకీయ పార్టీలు సైతం ఆయనకున్న ఫాలోయింగ్‌ దృష్ట్యా మద్దతు కోసం ఆయన్ను పలు సందర్భాల్లో కలవడానికి ప్రయత్నించింది కూడా తెలిసిందే. దీంతో ఎప్పటికప్పుడు రజిని రాజకీయ ప్రవేశం చర్చనీయాంశం అవుతోంది.
ఇక ఇదిలా ఉంటే… రజనీకాంత్‌ను అలనాటి హీరోయిన్, కాంగ్రెస్ నేత నగ్మా కలిశారు. చెన్నైలోని రజనీ నివాసంలో ఆమె ఆయన్ను కలిశారు. అయితే.. రజనీతో నగ్మా సమావేశానికి గల కారణాలు తెలియరాలేదు. రజనీకాంత్‌ను కలిసినట్టు నగ్మా తన ట్విట్టర్‌లో వెల్లడించారు. ఆయనతో సమావేశం చాలా ఆనందాన్నిచ్చిందని, పలు అంశాలపై రజనీతో చర్చించానని ఆమె ట్విట్టర్‌లో వెల్లడించారు.
అయితే.. రజనీతో ఆమె ఏ విషయాలు చర్చించారన్నది మాత్రం వెల్లడించలేదు. మామూలుగానే రజనీని కలిశారా..? లేదా ఆ సమావేశానికి ఏదైనా రాజకీయ ప్రాధాన్యం ఉందా..? అని కోలీవుడ్ వర్గాలు చర్చించుకుంటున్నాయి. ప్రస్తుతం నగ్మా కాంగ్రెస్ పార్టీలో కీలక బాధ్యతలు నిర్వర్తిస్తున్నారు. ఆమె రజనీతో కలిసి భాషా చిత్రంలో నటించిన సంగతి తెలిసిందే.
