అహ! నా పెళ్ళంట ! సినిమా షూటింగ్ జరుగుతున్న రోజులు అవి. హైదరాబాద్ లో షెడ్యూల్ ప్లాన్ చేశారు. విలక్షణ నటుడు నూతన్ ప్రసాద్ ఒక కీలక పాత్రలో నటిస్తున్నారు. దాంతో ఆయన షూట్ కోసం మద్రాసు నుండి హైదరాబాద్ కి రావాల్సి వచ్చింది. అయితే, ఆయన హైదరాబాద్ ఎప్పుడు వచ్చినా ‘ప్రశాంత కుటీర్‌’ అనే హోటల్ లోనే దిగేవారు. అప్పట్లో సినిమా వాళ్లకు అది అడ్డా. పైగా నూతన్ ప్రసాద్ గారు హైదరాబాద్ ఎప్పుడొచ్చినా ఫ్యామిలీతో కలిసి రావడం ఆయనకు అలవాటు. ప్రశాంత కుటీర్‌ లో దిగగానే ఆయనకు ఎవరో చెప్పారట. మూడో నంబర్ రూమ్ లో నటుడు సుత్తి వీరభద్ర రావు ఉన్నాడని.
నూతన్ ప్రసాద్ గారు తన ఫ్యామిలీ మెంబర్స్ ను రూమ్ కి వెళ్లిపోమని, వెంటనే ఆయన సుత్తి వీరభద్ర రావు రూమ్ దగ్గరకి వెళ్లి, కాలింగ్‌ బెల్‌ కొట్టారు. సుత్తి వీరభద్ర రావు తుండుగుడ్డ చుట్టుకుని డోర్ ఓపెన్ చేశాడు, ఎదురుగా ఈయన. సుత్తి వీరభద్ర రావు షాక్ అవుతూ.. ‘అయ్యో నూతన్ ప్రసాద్ గారు మీరా..? ఎవరో క్లినర్ అనుకుని’ అని నసుగుతూ గబగబా వెళ్లి బట్టలు వేసుకుని.. ఎదురుగా ఉన్న నూతన్ ప్రసాద్ గారికి మర్యాద చేస్తూ కుర్చీ వేసి కుశల ప్రశ్నలు అడగడం మొదలుపెట్టాడు. నూతన్ ప్రసాద్ గారు ఏమి మాట్లాడకుండా కాసేపు అలాగే చూస్తూ… ‘వీరభద్ర రావు గారు, మిమ్మల్ని చూడాలని వచ్చాను’, మీకు కుదిరితే రెండు ముక్కలు మాట్లాడి వెళ్తాను’ అన్నారు.
Also Read:భారీ బడ్జెట్‌తో Kantara 2!
అయ్యో, మీరు కబురు పంపితే నేనే మీ దగ్గరకు వచ్చేవాడిని కదా సర్ అంటూ సుత్తి వీరభద్ర రావు ఎదురుగా కూర్చుండిపోయాడు. ఎందుకంటే వీరభద్ర రావు, పరిశ్రమలో రాకముందు నుండే.. నూతన్ ప్రసాద్ గారు అత్యున్నతమైన స్థాయిలో ఉన్నారు. అందుకే, ఆయన అంటే సుత్తి వీరభద్ర రావుకు అభిమానం. ఆ అభిమానం వల్లే.. ఆయనకు ఎదురుగా కింద కూర్చున్నారు. కానీ, నూతన్ ప్రసాద్ గారు మాత్రం సుత్తి వీరభద్ర రావును బలవంతంగా కుర్చీలో కూర్చోపెట్టి.. వీరభద్ర రావు గారు, మీరు గొప్ప నటులయ్యా. మా పిల్లలు కూడా నీకే అభిమానులు అయ్యా. సినిమా ఇండస్ట్రీలో నీకు మంచి భవిష్యత్తు ఉందయ్యా. నువ్వు డైలాగ్‌ లు చెప్పే విధానం ముచ్చటగా ఉంటుంది. బోలెడు భవిష్యత్తు ఉన్నోడివి. కాబట్టి, ఆరోగ్యం జాగ్రత్త’ అంటూ నూతన్ ప్రసాద్ గారు వెళ్ళడానికి పైకి లేచారు. వీరభద్ర రావు ఆయనకు నమస్కారం చేసి ఆయన వైపు అలాగే అభిమానంగా చూస్తూ ఉండిపోయారు.
Also Read:మెట్ లైఫ్ సంస్థ ప్రతినిధులతో మంత్రి కేటీఆర్
