అత్యంత భారీ బడ్జెట్ తో విలక్షణ నటుడు కమల్ హాసన్ నట విశ్వరూపం చూపించిన సినిమా విశ్వరూపం. ఈ సినిమా సీక్వెల్ కి శ్రీకారం చుట్టి .. దాదాపుగా పూర్తి చేశాడు. అయితే కొన్ని కారణాల వలన ఈ సినిమా ఆగిపోయింది. తొలిభాగాన్ని మించిన స్థాయిలో ఈ చిత్రం తెరకెక్కిందని ఈ సినిమా కోసం కమల్ ఎంతో కష్టపడ్డారని తెలుస్తోంది. నాలుగేళ్లుగా నానా తంటాలు పడుతున్నా విశ్వరూపం2 మాత్రం విడుదలకు నోచుకోలేకపోయింది.
ఇటీవల ‘విశ్వరూపం2 చిత్రాన్ని 2017 కేలండర్ ఇయర్ లోనే విడుదల చేసే బాధ్యతలను రాజ్ కమల్ ఇంటర్నేషనల్ తీసుకుందని ప్రకటించేందుకు చాలా సంతోషంగా ఉంది’ అంటూ ప్రకటించారు కమల్ హాసన్. తాజాగా ఈ సినిమాను ‘విశ్వరూపం 2’ అక్టోబర్‌ 18న విడుదల చేసే అవకాశం ఉందని కోలీవుడ్‌ లో వినిపిస్తోంది. ఈ మధ్యనే సినిమాలో మిగిలిన చివరి పాటను తెరకెక్కిస్తున్నట్లు కమల్ వెల్లడించారు. హిందీలో ఈ పాటను ప్రసూన్‌ జోషి రచించగా తమిళంలో కమల్ స్వయంగా రాయడం విశేషం.
ఇప్పటికే డబ్బింగ్‌ తదితర నిర్మాణానంతర కార్యక్రమాలను వేగంగా పూర్తి చేస్తున్నారని తెలుస్తోంది. తమిళం, తెలుగు, హిందీ భాషల్లో విడుదల కానున్న ఈ చిత్రానికి జిబ్రాన్‌ సంగీతం అందిస్తున్నారు. పూజా కుమార్‌, ఆండ్రియా, రాహుల్‌ బోస్‌, శేఖర్‌ కపూర్‌, వహీదా రెహమాన్‌ తదితరులు నటిస్తున్నారు.
కాగా, విశ్వరూపం సినిమా ఓ వర్గం తమ మనోభావాలను దెబ్బతీసేదిగా ఉందంటూ తమిళనాడులో విడుదలకానీయబోమని ప్రకటించారు. దీంతో పాటు మరికొన్ని వివాదాలు చుట్టుముట్టాయి. ‘విశ్వరూపం 2’ సినిమా కూడా కమల్ కి సంచలన విజయాన్ని అందిస్తుందేమో చూడాలి.
