టాలీవుడ్‌ పవర్ స్టార్ పవన్ కల్యాణ్ హీరోగా క్రిష్ దర్శకత్వంలో తెరకెక్కుతున్న చిత్రం ‘హరిహర వీరమల్లు’. ఈ సినిమా త్వరలోనే మళ్లీ సెట్స్ పైకి వెళ్లనుంది. సరికొత్త షెడ్యూల్ త్వరలో రామోజీ ఫిల్మ్ సిటీలో జరగబోతోంది. ఈ మూవీ కోసం అప్పటి కాలాన్ని ప్రతిబింబించేలా అద్భుతమైన సెట్టింగ్స్ కు రూపకల్పన చేస్తున్నట్టు తెలుస్తోంది. ప్రస్తుతం హైదరాబాదులో సీనియర్ ఆర్ట్ డైరెక్టర్ తోట తరణి పర్యవేక్షణలో ఈ సెట్టింగ్స్ సిద్ధం చేయిస్తున్నారు.
ఈ క్రమంలో తోటతరణి, పవర్ స్టార్ కలిసి ముచ్చటించుకుంటున్న ఫోటోను షేర్ చేస్తూ షూటింగ్ త్వరలోనే తిరిగి ప్రారంభం కానుందని మేకర్స్ తెలిపారు. ఈ సెట్ లోనే బ్యాలెన్స్ షూట్ మొత్తం జరగబోతోందని సమాచారం. ఈ సెట్టింగ్స్ ఒకదాన్ని మించిపోయేలా మరొకటి ఉంటాయని టాక్ వినిపిస్తోంది. పవన్ చిత్రంలో ప్రాచీన భారతదేశాన్ని ఆవిష్కరించేందుకు క్రిష్ ఎంతో హార్డ్ వర్క్ చేస్తున్నారు.
రాబిన్ హుడ్ తరహాలోని పాత్రతో ‘వీరమల్లు’ గా పవర్ స్టార్ ఈ సినిమాతో అభిమానులకు మరోసారి మాస్ ఫీస్ట్ ఇవ్వబోతున్నారు. మొఘలాయీల కాలానికి చెందిన ఫిక్షనల్ స్టోరీగా ఈ సినిమా తెరకెక్కుతోంది. ఇందులో కోహినూర్ వజ్రం ప్రస్తావన ప్రధానంగా ఉండబోతోందని తెలుస్తోంది. జానపద జోనర్ లోని పీరియాడికల్ మూవీగా ప్రేక్షకులకు సరికొత్త అనుభూతినివ్వబోతోంది చిత్రం. ఈ చిత్రంలో పవన్ సరసన నిధి అగర్వాల్ కథానాయికగా నటిస్తోంది.
