టాలీవుడ్ డైరెక్టర్‌ రాజమౌళి దర్శకత్వంలో తెరకెక్కిన ‘ఆర్ఆర్ఆర్’ చిత్రం నేడు ప్రపంచవ్యాప్తంగా విడుదలై భారీ విజయాన్ని సొంతం చేసుకుంది. పాన్‌ ఇండియా లెవల్లో ఈ చిత్రం విడుదలైన అన్ని చోట్లా.. పాజిటివ్ టాక్‌తో దూసుకుపోతోంది. ముఖ్యంగా చరణ్, తారక్‌ల నటనకు ఫ్యాన్స్ పండగ చేసుకుంటున్నారు. ఇక ఈ చిత్రాన్ని చూసిన సెలబ్రిటీలందరూ అద్భుతం అంటూ ట్వీట్స్ చేస్తున్నారు. ఈ క్రమంలో ఆర్ఆర్ఆర్ చూసిన మెగాస్టార్ చిరంజీవి కూడా స్పందించారు. ‘ఆర్ఆర్ఆర్’ సినిమా ‘మాస్టర్ పీస్’ అంటూ ట్వీట్ చేశారు.
మెగాస్టార్ చిరంజీవి కుటుంబ సభ్యులతో కలిసి ఏఎమ్‌బి సినిమాస్‌‌లో ఈ చిత్రాన్ని చూశారు. ఈ సందర్భంగా ఆయన ట్విట్టర్ వేదికగా ‘ఆర్ఆర్ఆర్’పై ప్రశంసల వర్షం కురిపించారు. ఆర్ఆర్ఆర్ మాస్టర్ స్టోరీ టెల్లర్‌ నుండి వచ్చిన మాస్టర్ పీస్. రాజమౌళి అసమానమైన సినిమాటిక్ విజన్‌కు ఇదొక సాక్ష్యం. టీమ్ మొత్తానికి హ్యాట్సాఫ్’’ అంటూ చిరంజీవి తన ట్వీట్‌లో పేర్కొన్నారు. ఇక చిరు నటించిన ఆచార్య చిత్రం విడుదలకు సిద్ధంగా ఉంది. పలు సినిమాలతో చిరు బిజీగా ఉన్నాడు.
