టాలీవుడ్‌ యంగ్‌ టైగర్‌ ఎన్టీఆర్ హోస్ట్‌గా వ్యవహరిస్తున్న గేమ్ షో ‘ఎవరు మీలో కోటీశ్వరులు’. ఎన్టీఆర్ తనదైన శైలిలో రాణిస్తూ కార్యక్రమాన్ని ముందుకు తీసుకెళ్తున్నాడు. ఈ షోలో సామన్యులతో పాటు అప్పుడప్పుడు సెలబ్రిటీలు సందడి చేస్తున్నారు. ఇప్పటికే రామ్ చరణ్, సమంత లు కూడా ‘ఎవరు మీలో కోటీశ్వరులు’ షోలో పాల్గొన్నారు.. ఇక తాజాగా ఈ కార్యక్రమంలో సూపర్ స్టార్ మహేష్‌ బాబు పాల్గొని సందడి చేశారు. దీనికి సంబంధించిన ప్రోమోను షో యాజమాన్యం యూట్యూబ్‌లో విడుదల చేసింది.
ఇక ప్రోమో విషయానికొస్తే.. “సెటప్ అదిరిపోయింది!” అంటూ మహేష్‌ బాబు కామెంట్ చేయగా, “నా రాజా” అంటూ ఎన్టీఆర్ ఉత్సాహంగా బదులివ్వడం ప్రోమోలో చూడొచ్చు. కాగా, తాను చెప్పిన సమాధానాన్ని ఎన్టీఆర్ అటు తిప్పి ఇటు తిప్పి తికమక పెట్టేందుకు ప్రయత్నించడంతో, “నీ కంటే మీ గురువు (కంప్యూటర్) గారే నయం” అంటూ మహేష్‌ నవ్వులు పూయించారు.. ప్రోమో చూస్తే ఈ ఎపిసోడ్ ఎలా ఉండబోతుందో అర్థం చేసుకోవచ్చు. ఈ ఎపిసోడ్ త్వరలోనే ప్రసారం కానుంది.
