ప్రస్తుతం టాలీవుడ్ లో స్టార్ హీరోల సినిమాలతో బిజీగా ఉంది రకుల్ ప్రీత్ సింగ్. మహేష్ బాబుతో పాటు చాలామంది స్టార్ హీరోలతో పని చేస్తోంది. అయితే ఈ అమ్మడుకి ఇప్పుడు కోలీవుడ్ నుంచి మరో భారీ ఆఫర్ వచ్చింది. ఇటీవలే ‘ఎస్-3’తో ప్రేక్షకులను పలకరించిన సూర్య బాక్సాఫీసు వద్ద కలెక్షన్ల వర్షం కురిపిస్తున్నాడు. ప్రస్తుతం విఘ్నేష్ శివన్ దర్శకత్వంలో ‘స్పెషల్ చబ్బీస్’ రీమేక్ లో నటిస్తున్నాడు. అయితే తన తదుపరి చిత్రాన్ని సెల్వరాఘవన్ దర్శకత్వంలో చేయనున్నాడు సూర్య.
త్వరలో సెల్వరాఘవన్ దర్శకత్వంలో రాబోతున్నన సూర్య చిత్రానికి రకుల్ ను కథానాయికగా ఎంచుకున్నారు. ఇప్పటికే కార్తి హీరోగా ‘తీరం అధికారం ఒండ్రు’ అనే సినిమాలో నటిస్తోంది రకుల్. అంతేకాదు ఇప్పుడు కార్తి అన్నయ్య సూర్యతో జోడీ కట్టే ఛాన్స్ కూడా కొట్టేసింది. హీరోయిన్ల ఎంపికలో సెల్వ రాఘవన్ డిఫెరెంట్‌ గా ఆలోచిస్తుంటాడు అనడంలో సందేహం లేదు. అతడి సినిమాల్లో కథానాయికల పాత్రలు కూడా చాలా భిన్నంగా, బలంగా ఉంటాయి. కాబట్టి రకుల్ కు ఇది మంచి ఛాన్స్ అనే అనుకోవాలి.
ఇప్పటికే మహేశ్ బాబు హీరోగా మురుగదాస్ రూపొందిస్తున్న భారీ చిత్రంలో కూడా ఈ చిన్నది హీరోయిన్‌ గా నటిస్తోంది. ఇది కూడా తమిళంలో విడుదల కానుంది. అలాగే తాజాగా ఒప్పుకున్న సూర్య చిత్రం కూడా కోలీవుడ్ లో తనకు మంచి ప్రాజక్ట్ అవుతుందని రకుల్ భావిస్తోంది.
ప్రస్తుతం తెలుగులో రకుల్ నటించిన ‘విన్నర్’ సినిమా విడుదలకు సిద్ధమవుతోంది. నాగచైతన్యతో కళ్యాణ్ కృష్ణ దర్శకత్వంలో చేస్తున్న సినిమా చిత్రీకరణ దశలో ఉంది. ఇవి కాక ఇంకో రెండు మూడు సినిమాలు కూడా రకుల్ చేతిలో ఉన్నాయి. మరి కోలీవుడ్ లో కూడా ఈ అమ్మడు ఎలా ఆకట్టుకుంటుందో చూడాలి. మొత్తానికి ఈ బ్యూటీకి అన్నీ అదిరిపోయే ఆఫర్లే వస్తున్నాయన్నమాట.
