దర్శకధీరుడు రాజమౌళి ప్రతిష్ఠాత్మకంగా తెరకెక్కిస్తున్న తాజా చిత్రం “ఆర్ఆర్ఆర్”. బాహుబలి సినిమా తర్వాత రాజమౌళి తెరకెక్కిస్తున్న చిత్రం ఆర్.ఆర్.ఆర్ ( వర్కింగ్ టైటిల్ మాత్రమే ).. పిరియాడిక్ యాక్షన్ డ్రామాగా తెరకెక్కుతున్న ఈ చిత్రంలో రామ్ చరణ్, ఎన్టీఆర్ ప్రధాన పాత్రలలో నటిస్తున్నారు. ఇందులో ఎన్టీఆర్ కొమరం భీమ్‌గా నటిస్తుండగా, రామ్ చరణ్ అల్లూరి సీతారామరాజుగా నటిస్తున్న సంగతి తెలిసిందే.
ఈ సినిమా షూటింగ్ ఇప్పటికే 80 శాతం పూర్తయినా, ఇంతవరకూ టైటిల్ ఏమిటన్న విషయమై స్పష్టత లేదు. వచ్చే సంవత్సరం జనవరి 8న సినిమా విడుదలకు సిద్ధమవుతుండగా, ఇటీవల ‘ఆర్ఆర్ఆర్’ వర్కింగ్ టైటిల్ కు సరిపోయే మంచి టైటిల్ ను ప్రేక్షకులు సూచించాలని చిత్ర యూనిట్ ప్రకటించిన సంగతి తెలిసిందే.
ఇక ‘రామ రావణ రాజ్యం’, ‘రఘుపతి రాఘవ రాజారామ్’ టైటిల్స్ కు అధిక స్పందన రాగా, అత్యధికులు ‘రామ రావణ రాజ్యం’ వైపే మొగ్గుచూపారు. ఇక హిందీలో ఈ సినిమాకు ‘రామ్ రావణ్ రాజ్’ అన్న పేరు పెట్టాలని రాజమౌళి అనుకుంటున్నట్టు టాలీవుడ్ వర్గాలు అంటున్నాయి. ఇక ‘ఆర్ఆర్ఆర్’ అంటే ఇదేనా? అన్నది తెలియాలంటే, అధికారిక ప్రకటన వచ్చేంత వరకూ ఆగాల్సిందే.
