వయస్సు పెరిగేకొద్దీ కండరాల నష్టం శక్తి, సమతుల్యత, మెటబాలిజం, స్వతంత్ర జీవనంపై తీవ్ర ప్రభావం చూపుతుంది. అయితే సరైన వ్యాయామం, పోషకాహారం, నిపుణుల మార్గదర్శకత్వంతో వృద్ధులు కూడా కండరాలను కాపాడుకోవడమే కాకుండా మళ్లీ పెంచుకోవచ్చు. దశాబ్దాలుగా కండరాల అభివృద్ధి యువతతోనే సంబంధం ఉందనే భావన ఉంది. 60 దాటాక కండరాల నష్టం తప్పదని, బరువులతో వ్యాయామం చేయకూడదని చాలామంది అనుకుంటారు. కానీ ఈ అపోహను ఇప్పుడు వైద్య నిపుణులు ఖండిస్తున్నారు. ఇంటర్నల్ మెడిసిన్, కార్డియాలజీ, ఆర్థోపెడిక్స్ విభాగాలకు చెందిన సీనియర్ వైద్యుల ప్రకారం, 60 తర్వాత కూడా కండరాల పెరుగుదల సాధ్యమే కాదు, ఆరోగ్యకరమైన వృద్ధాప్యానికి అది అత్యవసరం.
వయస్సుతో వచ్చే కండరాల నష్టాన్ని సార్కోపీనియా అంటారు. ఇది శక్తి తగ్గడం, సమతుల్యత లోపించడం, అలసట, స్వతంత్రత కోల్పోవడం వంటి సమస్యలకు కారణమవుతుంది. చాలా సందర్భాల్లో చిన్న గాయాలే ప్రాణాంతకంగా మారడానికి ఇదే కారణం. సరైన వ్యాయామం, ఆహారం, వైద్య పర్యవేక్షణ ఉంటే ఈ పరిస్థితిని నియంత్రించవచ్చు.
50 ఏళ్ల తర్వాత కండరాల తగ్గుదల వేగం పెరుగుతుంది, 60ల్లో ఇది మరింత స్పష్టంగా కనిపిస్తుంది. సార్కోపీనియా వల్ల బలహీనత, పడిపోవడం, ఎముకలు విరిగే ప్రమాదం పెరుగుతుంది. దీనికి తోడు భారతీయ సంప్రదాయ ఆహారం ఎక్కువ కార్బోహైడ్రేట్లు, తక్కువ నాణ్యమైన ప్రోటీన్ కలిగి ఉండటం కూడా సమస్యను తీవ్రతరం చేస్తుంది.
60ల్లో కండరాల వ్యాయామం చేయకూడదన్నది ఒక అపోహ. సరైన మార్గదర్శకత్వం ఉంటే మోస్తరు బరువులతో సురక్షితంగా స్ట్రెంగ్త్ ట్రైనింగ్ చేయవచ్చు. లక్ష్యం బాడీబిల్డింగ్ కాదు, పనికి వచ్చే బలం అని నిపుణులు చెబుతున్నారు. భారీ బరువులు, పర్యవేక్షణ లేకుండా చేసే వ్యాయామాలు సరిపోకపోవచ్చు. కానీ రెసిస్టెన్స్ బ్యాండ్లు, తేలికపాటి డంబెల్స్, శరీర బరువుతో చేసే వ్యాయామాలు, యోగా, పిలాటీస్ వంటి తక్కువ ప్రభావం కలిగిన వ్యాయామాలతో కండరాలు పెంచుకోవచ్చు.
తక్కువ బరువులతో ప్రారంభించి నెమ్మదిగా పెంచాలి
రెసిస్టెన్స్ బ్యాండ్లు, తేలికపాటి డంబెల్స్ లేదా నీటి బాటిళ్లను కూడా ఉపయోగించవచ్చు
కుర్చీ నుంచి లేవడం-కూర్చోవడం, చిన్న స్టెప్-అప్స్ వంటి వ్యాయామాలు చాలా ఉపయోగకరం
తీవ్రత కంటే నియమితత్వం ముఖ్యం – వారానికి 3–4 రోజులు, 30 నిమిషాలు సరిపోతాయి
బరువు ఎంత అన్నదానికంటే శరీర భంగిమ, ఫామ్ ముఖ్యం. సరైన వార్మ్-అప్ చేయాలి. వెన్నెముక, మోకాలిపై ఎక్కువ ఒత్తిడి పడే వ్యాయామాలు తప్పించాలి.వృద్ధులు కండరాల వ్యాయామాన్ని పూర్తిగా మానేయాలి అనుకోవడం తప్పు. సరైన మార్గదర్శకత్వంతో కండరాల అభివృద్ధి సురక్షితమూ, ఎంతో ప్రయోజనకరమూ. అందుకే వృద్ధుల రోజువారీ జీవితంలో ఏదో ఒక రకమైన వ్యాయామం తప్పనిసరిగా ఉండాలని వైద్యులు సూచిస్తున్నారు.
Also Read:BRS:లక్ష సంతకాల సేకరణ