యాసంగిలో ధాన్యం కొనుగోళ్లకు సంబంధించి మంగళవారం నాటికి రైతు ఖాతాలో రూ. 4,006 కోట్లను జమ చేశామని, మంగళవారం ఒక్కరోజే రూ. 290 కోట్లను విడుదల చేయడం జరిగిందని పౌరసరఫరాల సంస్థ చైర్మన్ మారెడ్డి శ్రీనివాస్ రెడ్డి తెలిపారు. ఇప్పటి వరకు 6341 కొనుగోలు కేంద్రాల ద్వారా 7.10 లక్షల మంది రైతుల నుంచి రూ. 7,404 కోట్ల విలువైన 40.38 లక్షల మెట్రిక్ టన్నుల ధాన్యాన్ని కొనుగోలు చేశామని, ఇందులో 38.44 లక్షల మెట్రిక్ టన్నుల ధాన్యాన్ని కొనుగోలు కేంద్రాల నుంచి రైసు మిల్లులకు తరలించడం జరిగిందని మారెడ్డి శ్రీనివాస్ రెడ్డి అన్నారు.
కొన్ని జిల్లాల్లో అకాల వర్షాలు పడుతున్న నేపథ్యంలో కొనుగోలు కేంద్రాలల్లో ధాన్యం నిల్వలు పేరుకుపోకుండా త్వరితగతిన రైసు మిల్లులకు తరలించాలని అధికారులను ఆదేశించారు. ఈ నెల 1వ తేదీ నుంచి 13వ తేదీ వరకు 83% రేషన్ లబ్దిదారులకు ఉచిత బియ్యాన్ని అందించడం జరిగిందని, 87.55 లక్షల కుటుంబాలకు గాను బుధవారం నాటికి 72.73 లక్షల (83%) మంది కార్డుదారులకు 2 లక్ష 72 వేల మెట్రిక్ టన్నుల బియ్యాన్ని, 2,488 మెట్రిక్ టన్నుల కందిపప్పును పంపిణీ చేయడం జరిగిందని తెలిపారు.