నైజీరియాలో మరోసారి ఉగ్రవాదుల దాడి ఘోర విషాదాన్ని మిగిల్చింది. క్వారా రాష్ట్రంలోని వోరో, నూకు అనే రెండు గ్రామాలపై ఇస్లామిక్ ఉగ్రవాదులు విరుచుకుపడ్డారు. ఈ దాడుల్లో విచక్షణారహితంగా జరిపిన కాల్పుల కారణంగా కనీసం 162 మంది ప్రాణాలు కోల్పోయారు. అమాయక గ్రామస్తులపై అకస్మాత్తుగా దాడి చేయడంతో గ్రామాలు రక్తసిక్తమయ్యాయి.
దాడి అనంతరం గ్రామాల్లోని పరిస్థితి భయానకంగా మారింది. పెద్ద సంఖ్యలో మృతదేహాలు వీధుల్లో పడి ఉండగా, వాటికి సంబంధించిన వీడియోలు సోషల్ మీడియాలో వైరల్ అవుతున్నాయి. ఈ దృశ్యాలు చూసినవారు తీవ్ర దిగ్భ్రాంతికి గురవుతున్నారు. స్థానికుల సమాచారం ప్రకారం, ఉగ్రవాదులు గంటల తరబడి కాల్పులు జరిపి ఇళ్లను తగలబెట్టారు. మహిళలు, పిల్లలు కూడా ఈ దాడుల్లో ప్రాణాలు కోల్పోయినట్లు తెలుస్తోంది.
ఘటనపై నైజీరియా ప్రభుత్వం తీవ్రంగా స్పందించింది. భద్రతా బలగాలు వెంటనే రంగంలోకి దిగాయని, దాడికి పాల్పడిన వారిని గుర్తించి కఠిన చర్యలు తీసుకుంటామని అధికారులు వెల్లడించారు. అయితే, ఈ ప్రాంతంలో ఇలాంటి దాడులు పునరావృతమవుతుండటంపై ప్రజలు ఆందోళన వ్యక్తం చేస్తున్నారు.
ALso Read:‘ధురంధర్’2లో యామీ గౌతమ్!
ఉగ్రవాద హింసతో నైజీరియా ఎన్నో ఏళ్లుగా బాధపడుతోంది. ఈ తాజా ఘటన మరోసారి అక్కడి భద్రతా పరిస్థితులపై ప్రశ్నలు లేవనెత్తుతోంది. అంతర్జాతీయ సమాజం కూడా ఈ దాడిని తీవ్రంగా ఖండిస్తూ, బాధితులకు సానుభూతి ప్రకటిస్తోంది.