న్యాచురల్ స్టార్ నాని ఇప్పుడు వరుస సినిమాలతో బిజీ అయ్యాడు. ఇప్పటికే రెండు సినిమాలను రిలీజ్ చేసిన నాని మరో రెండు సినిమాలను లైన్ లో పెట్టాడు. ఈ ఏడాది ఫిబ్రవరిలో కృష్ణగాడి వీర ప్రేమగాథ సినిమాతో ప్రేక్షకుల ముందుకు వచ్చిన నాని, జూన్ లో జెంటిల్ మన్ గా ఆకట్టుకున్నాడు. ప్రస్తుతం ఉయ్యాల జంపాల ఫేం విరించి వర్మ దర్శకత్వంలో మజ్ను సినిమా చేస్తున్న నాని, ఈ సినిమాను సెప్టెంబర్ 17న రిలీజ్ చేయాలని ఫిక్స్ అయ్యాడు.
విరించి వర్మతో నాని చేసిన ఈ మూవీ ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది. జెమిని కిరణ్ నిర్మిస్తున్న మజ్ను చిత్రంలో అను ఇమాన్యుయేల్ కథానాయికగా నటిస్తోంది. స్టైల్ కామెడీతో రొమాంటిక్ ఎంటర్‌టైనర్‌గా తెరకెక్కుతున్న ఈ చిత్రానికి సంబంధించి తాజాగా ఓ లిరికల్ వీడియో విడుదల చేశారు. అంతేకాదు తన అఫీషియల్ పేజ్ ద్వారా ఆగస్ట్ 26న మజ్ఞు మూవీ ఆడియో వేడుక జరుగనున్నట్టు తెలిపాడు నాని.
